आदिपर्व- अध्याय 020

  

1. आदिपर्व- अध्याय 020

॥ श्रीः ॥

1.20. अध्यायः 020

Mahabharata - Adi Parva - Chapter Topics

कद्रूविनतयोः पणबन्धः॥ 1 ॥ सर्पाणां कद्रूशापः॥ 2 ॥ ब्रह्मणा कश्यपाय विषहरविद्यादानं॥ 3 ॥

Mahabharata - Adi Parva - Chapter Text

1-20-0(1268)

सौतिरुवाच। 1-20-0x(83)

एतत्ते कथितं सर्वममृतं मथितं यथा।

यत्र सोऽश्वः समुत्पन्नः श्रीमानतुलविक्रमः॥ 1-20-1(1269)

तं निशाम्य तदा कद्रूर्विनतामिदमब्रवीत्।

उच्चैःश्रवा हि किंवर्णो भद्रे प्रब्रूहि मा चिरम्॥ 1-20-2(1270)

विनतोवाच। 1-20-3x(84)

श्वेत एवाश्वराजोऽयं किं वा त्वं मन्यसे शुभे।

ब्रूहि वर्णं त्वमप्यस्य ततोऽत्र विपणावहे॥ 1-20-3(1271)

कद्रूरुवाच। 1-20-4x(85)

कृष्णवालमहं मन्ये हयमेनं शुचिस्मिते।

एहि सार्धं मया दीव्य दासीभावाय भामिनि॥ 1-20-4(1272)

सौतिरुवाच। 1-20-5x(86)

एवं ते समयं कृत्वा दासीभावाय वै मिथः।

जग्मतुः स्वगृहानेव श्वो द्रक्ष्याव इति स्म ह॥ 1-20-5(1273)

ततः पुत्रसहस्रं तु कद्रूर्जिह्यं चिकीर्षती।

आज्ञापयामास तदा वाला भूत्वाऽञ्जनप्रभाः॥ 1-20-6(1274)

आविशध्वं हयं क्षिप्रं दासी न स्यामहं यथा।

नावपद्यन्त ये वाक्यं ताञ्शशाप भुजंगमान्॥ 1-20-7(1275)

सर्पसत्रे वर्तमाने पावको वः प्रधक्ष्यति।

जनमेजयस्य राजर्षेः पाण्डवेयस्य धीमतः॥ 1-20-8(1276)

शापमेनं तु शुश्राव स्वयमेव पितामहः।

अतिक्रूरं समुत्सृष्टं कद्र्वा दैवादतीव हि॥ 1-20-9(1277)

सार्धं देवगणैः सर्वैर्वाचं तामन्वमोदत।

बहुत्वं प्रेक्ष्य सर्पाणां प्रजानां हितकाम्यया॥ 1-20-10(1278)

तिग्मवीर्यविषा ह्येते दन्दशूका महाबलाः।

तेषां तीक्ष्णविषत्वाद्धि प्रजानां च हिताय च॥ 1-20-11(1279)

युक्तं मात्रा कृतं तेषां परपीडोपसर्पिणाम्।

अन्येषामपि सत्त्वानां नित्यं दोषपरास्तु ये॥ 1-20-12(1280)

तेषां प्राणान्तिको दण्डो दैवेन विनिपात्यते।

एवं संभाष्य देवस्तु पूज्य कद्रूं च तां तदा॥ 1-20-13(1281)

आहूय कश्यपं देव इदं वचनमब्रवीत्।

यदेते दन्दशूकाश्च सर्पा जातास्त्वयानघ॥ 1-20-14(1282)

विषोल्बणा महाभोगा मात्रा शप्ताः परंतप।

तत्र मन्युस्त्वया तात न कर्तव्यः कथंचन॥ 1-20-15(1283)

दृष्टं पुरातनं ह्येतद्यज्ञे सर्पविनाशनम्।

इत्युक्त्वा सृष्टिकृद्देवस्तं प्रसाद्य प्रजापतिम्।

प्रादाद्विषहरीं विद्यां कश्यपाय महात्मने॥ 1-20-16(1284)

`एवं शप्तेषु नागेषु कद्र्वातु द्विजसत्तम।

अद्विग्नः शापतस्तस्याः कद्रूं कर्कोटकोऽब्रवीत्॥ 1-20-17(1285)

मातरं परमप्रीतस्तथा भुजगसत्तमः।

आविश्य वाजिनं मुख्यं बालो भूत्वाञ्जनप्रभः॥ 1-20-18(1286)

दर्शयिष्यामि तत्राहमात्मानं काममाश्वस।

एवमस्त्विति सा पुत्रं प्रत्युवाच यशस्विनी'॥ ॥ 1-20-19(1287)

इति श्रीमन्महाभारते आदिपर्वणि आस्तीकर्पणि विंशोऽध्यायः॥ 20 ॥

Mahabharata - Adi Parva - Chapter Footnotes

1-20-3 विपणावहे पणं कुर्वहे॥ 1-20-6 जिह्मं कौटिल्यं। वालाः लोमानि॥ 1-20-7 नावपद्यन्त नानुमोदितवन्तः॥ विंशोऽध्यायः॥ 20 ॥