आदिपर्व - अध्याय 011

  

Mahabharata - महाभारतम्

1. आदिपर्व - अध्याय 011

॥ श्रीः ॥

1.11. अध्यायः 011

Mahabharata - Adi Parva - Chapter Topics

डुण्डुभचरितम्॥ 1 ॥

Mahabharata - Adi Parva - Chapter Text

1-11-0(1049)

डुण्डुभ उवाच। 1-11-0x(54)

सखा बभूव मे पूर्वं खगमो नाम वै द्विजः।

भृशं संशितवाक्तात तपोबलसमन्वितः॥ 1-11-1(1050)

स मया क्रीडता बाल्ये कृत्वा तार्णं भुजंगमम्।

अग्निहोत्रे प्रसक्तस्तु भीषितः प्रमुमोह वै॥ 1-11-2(1051)

लब्ध्वा स च पुनः संज्ञां मामुवाच तपोधनः।

नर्दहन्निव कोपेन सत्यवाक्संशितव्रतः॥ 1-11-3(1052)

यथावीर्यस्त्वया सर्पः कृतोऽयं मद्बिभीषया।

तथावीर्यो भुजंगस्त्वं मम शापाद्भविष्यसि॥ 1-11-4(1053)

तस्याहं तपसो वीर्यं जानन्नासं तपोधन।

भृशमुद्विग्नहृदयस्तमवोचमहं तदा॥ 1-11-5(1054)

प्रणतः संभ्रमाच्चैव प्राञ्जलिः पुरतः स्थितः।

सखेति हसतेदं ते नर्मार्थं वै कृतं मया॥ 1-11-6(1055)

क्षन्तुमर्हसि मे ब्रह्मञ्शापोऽयं विनिवर्त्यताम्।

सोऽथ मामब्रवीद्दृष्ट्वा भृशमुद्विग्नचेतसम्॥ 1-11-7(1056)

मुहुरुष्णं विनिःश्वस्य सुसंभ्रान्तस्तपोधनः।

नानृतं वै मया प्रोक्तं भवितेदं कथंचन॥ 1-11-8(1057)

यत्तु वक्ष्यामि ते वाक्यं शृणु तन्मे तपोधन।

श्रुत्वा च हृदि ते वाक्यमिदमस्तु सदाऽनघ॥ 1-11-9(1058)

उत्पत्स्यति रुरुर्नाम प्रमतेरात्मजः शुचिः।

तं दृष्ट्वा शापमोक्षस्ते भविता नचिरादिव।

`एवमुक्तस्तु तेनाहमुरगत्वमवाप्तवान्॥' 1-11-10(1059)

स त्वं रुरुरिति ख्यातः प्रमतेरात्मजोऽपि च।

स्वरूपं प्रतिपद्याहमद्य वक्ष्यामि ते हितम्॥ 1-11-11(1060)

सौतिरुवाच। 1-11-12x(55)

स डौण्डुभं परित्यज्य रूपं विप्रर्षभस्तदा।

स्वरूपं भास्वरं भूयः प्रतिपेदे महायशाः॥ 1-11-12(1061)

इदं चोवाच वचनं रुरुमप्रतिमौजसम्।

अहिंसा परमो धर्मः सर्वप्राणभृतां वर॥ 1-11-13(1062)

तस्मात्प्राणभृतः सर्वान्न हिंस्याद्ब्राह्मणः क्वचित्।

ब्राह्मणः सौम्य एवेह भवतीति परा श्रुतिः॥ 1-11-14(1063)

वेदवेदाङ्गविन्नाम सर्वभूताभयप्रदः।

अहिंसा सत्यवचनं क्षमा चेति विनिश्चितम्॥ 1-11-15(1064)

ब्राह्मणस्य परो धर्मो वेदानां धारणापि च।

क्षत्रियस्य हि यो धर्मः स नेहेष्येत वै तव॥ 1-11-16(1065)

दण्डधारणमुग्रत्वं प्रजानां परिपालनम्।

तदिदं क्षत्रियस्यासीत्कर्म वै शृणु मे रुरो॥ 1-11-17(1066)

जनमेजयस्य यज्ञेऽस्मिन्सर्पाणां हिंसनं पुरा।

परित्राणं च भीतानां सर्पाणां ब्राह्मणादपि॥ 1-11-18(1067)

तपोवीर्यबलोपेताद्वेदवेदाङ्गपारगात्।

आस्तीकाद्द्विजमुख्याद्वै सर्पसत्रे द्विजोत्तम॥ ॥ 1-11-19(1068)

इति श्रीमन्महाभारते आदिपर्वणि पौलोमपर्वणि एकादशोऽध्यायः॥ 11 ॥

Mahabharata - Adi Parva - Chapter Footnotes

1-11-1 संशितवाक् तीक्ष्णवचनः॥ 1-11-2 तार्णं तृणमयम्॥ 1-11-14 सौम्यः अतीक्ष्णस्वभावः॥ 1-11-18 परित्राणं दृष्टमिति शेषः॥ एकादशोऽध्यायः॥ 11 ॥