यजुर्वेद प्रथम अध्याय मंत्रा

1.  ओ३म्  इ॒षे त्वो॒र्जे  त्वा॑ वा॒यव॑ स्थ दे॒वो वः॑ सवि॒ता प्रार्प॑यतु॒ श्रेष्ठ॑तमाय॒ कर्मण॒ऽआप्या॑यध्वमघ्नया॒ऽइन्द्रा॑य भा॒गम्प्र॒जाव॑तीरनमी॒वाऽय॒क्ष्मा मा व॑स्तेनऽईशत॒ माघꣳश सो ध्रु॒वाऽअ॒स्मिन॒ गोप॑तौ स्यात ब॒ह्वीर्यज॑मानस्य प॒शून्पा॒हि।। १।।

2.                       ओ३म् वसोः॑ प॒वित्र॑मसि॒ द्यौर॑सि पृथि॒व्य॒सि मात॒रिश्व॑नो घ॒र्मो॒ऽसि । वि॒श्वधा॑ऽअसि । प॒र॒मेण॒ धाम्ना॒ दृꣳहस्व॒ मा ह्वा॒र्मा ते॑ य॒ज्ञप॑तिर्ह्वार्षीत्।। २।।

3.                       ओ३म् वसोः॑ प॒वित्र॑मसि श॒तधा॑रं॒ वसोः॑ प॒वित्र॑मसि स॒हस्त्रधारम् । दे॒वस्त्वा॑ सवि॒ता पु॑नातु॒ वसोः॑ प॒वित्रे॑ण श॒तधा॑रेण सु॒प्वा काम॑धुक्षः ।। ३।।

4.                       ओ३म् सा वि॒श्वायुः॒ सा वि॒श्वकर्मा॒ सा वि॒श्वधा॑याः । इन्द्र॑स्य त्वा भा॒ग सोमे॒नात॑नच्मि॒ विष्णो॑ ह॒व्यꣳरक्ष ।। ४।।

5.                       ओ३म् अग्ने॑ व्रतपते व्र॒तं च॑रिष्यामि॒ तच्छ॑केयं॒ तन्मे॑ राध्यताम् । इ॒दम॒हमनृ॑ता स॒त्यमुपै॑मि ।। ५ ।।

6.                       ओ३म् कस्त्वा॑ युनक्ति॒ स त्वा॑ युनक्ति॒ कस्मै॑ त्वा युनक्ति॒ तस्मै॑ त्वा युनक्ति। कर्म॑णे वां॒ वेषा॑य वाम् ।। ६।।

7.                       ओ३म् प्रत्यु॑ष्ट॒ꣳरक्षः॒ प्रत्यु॑ष्टा॒ऽअरा॑तयो॒ निष्ट॑प्त॒ꣳ रक्षो॒ निष्ट॑प्ता॒ऽअरा॑तयः ।। उ॒र्वन्तरि॑क्ष॒मन्वे॑मि ।। ७।।

8.                       ओ३म् धूर॑सि॒ धूर्व॒ धूर्व॑न्त॒ धूर्व॒ तं योऽस्मान धूर्वति॒ तं धूर्व॒ यं व॒यं धूर्वा॑मः। देवाना॑मसि॒ वह्नितम॒ꣳ सस्त्नि॑तमं॒ पप्रि॑तमं॒ जुष्ट॑तमं देव॒हूत॑मम् ।। ८।।

9.                       ओ३म् अह्रु॑तमसि हवि॒र्धानं॒ दृꣳहस्व॒ मा ह्वा॒र्मा ते॑ यज्ञप॑तिर्ह्वार्षीत् । विष्णु॑स्त्वा क्रमतामु॒रु वाता॒याप॑हत॒ꣳरक्षो॒ यच्छ॑न्तां॒ पञ्च॑ ।। ९।।

10.                 ओ३म् दे॒वस्य॑ त्वा सवि॒तुः प्रस॒वेऽश्विनो॑र्बा॒हुभ्यां॑ पू॒ष्णो हस्ता॑भ्याम् । अ॒ग्नये॒ जुष्टं॑ गृह्राम्य॒ग्नीषोमा॑भ्यां जुष्टं॑ गृह्णामि ।। १०।।

11.                   ओ३म् भू॒ताय॑ त्वा॒ नारा॑तये॒ स्व॒रभि॒विख्येषं॒ दृꣳहन्तां॒ दुर्य्याः पृथि॒व्यामु॒र्वन्तरि॑क्षमन्वे॑मि पृथि॒व्यास्त्वा॒ नाभौ॑ सादया॒म्यदित्याऽउ॒पस्थेऽग्ने ह॒व्यꣳ र॒क्ष ।। ११ ।।

12.                 ओ३म् प॒वित्रे॑ स्थो वैष्ण॒व्यौ॒ सवि॒तुर्वः॑ प्रस॒व उत्पुना॒म्यच्छि॑द्रेण प॒वित्रे॑ण॒ सूर्य्यस्य र॒श्मिभिः॑ ।। देवी॑रापोऽअग्रेगुवोऽअग्रेपु॒वोग्र॑ऽइ॒मम॒द्य य॒ज्ञं न॑यताग्रे॑ यज्ञप॑तिꣳ सु॒धातुं॑ य॒ज्ञप॑तिन्देव॒युवम् ।। १२ ।।

13.                 ओ३म् यु॒ष्माऽइन्द्रो॑ऽवृणीत वृत्र॒तूर्ये॑ यू॒यमिन्द्र॑मवृणीध्व वृत्र॒तूर्ये॒ प्रोक्षि॑ता स्थ । अ॒ग्नये त्वा॒ जुष्टं॒ म्प्रोक्षा॑म्य॒ग्नीषोमा॑भ्यां त्वा॒ जुष्टं॒ प्रोक्षा॑मि । दैव्या॑य कर्म॑णे शुन्धध्वन्देवय॒ज्यायै॒ यद्वोऽशु॑द्धा पराज॒ध्नुरि॒दं व॒स्तच्छु॑न्धामि ।। १३।।

14.                ओ३म् शर्मा॒स्यव॑धूत॒ꣳ रक्षोऽव॑धूता॒ऽअरा॑त॒योऽदित्या॒स्त्वग॑सि॒ प्रति॒ त्वादि॑तिर्वेत्तु । अद्रि॑रसि वानस्प॒त्यो ग्रावा॑सि पृ॒थुबु॑ध्नः॒ प्रति॒ त्वादि॑त्या॒स्त्वग्वे॑त्तु ।। १४।।

15.                 ओ३म् अ॒ग्नेस्त॒नूर॑सि वा॒चो वि॒सर्ज॑नं देववी॑तये त्वा गृह्णामि बृहद्ग्रा॑वासि वानस्प॒त्यः सऽइदं देवेभ्यो॑ ह॒विः श॑मीष्व सु॒शमि॑ शमीष्व । हवि॑ष्कृ॒देहि॑ हवि॑ष्कृ॒देहि॑ ।। १५।।

16.                 ओ३म् कु॒क्कु॒टोऽसि॒ मधु॑जिह्व॒ऽइष॒मूर्ज॒माव॑द॒ त्वया॑ व॒याꣳ सं॑घा॒तꣳ सं॑घा॒तं जैष्म व॒र्षवृ॑द्धमसि॒ प्रति॑ त्वा व॒र्षवृ॑द्ध वेत्तु॒ परा॑पूत॒ꣳ रक्षः॒ परा॑पूता॒अरा॑त॒योप॑हत॒ꣳ रक्षों वा॒युर्वो॒ विवि॑नक्तु दे॒वो वः॑ सवि॒ता हिर॑ण्यपाणिः॒ प्रति॑ गृभ्णा॒त्वच्छि॑द्रेण पा॒णिना॑ ।। १६।।

17.                 ओ३म् धृष्टिर॒स्यपाग्नेऽअ॒ग्निमा॒मादं॑ जहि॒ निष्क्र॒व्याद॑ꣳ से॒धा दे॑व॒यजं वह। ध्रु॒वम॑सि पृथि॒वीं दृ॑ꣳह ब्रह्म॒वनि॑ त्वा क्षत्र॒वनि॑ सजात॒वन्युप॑दधामि॒ भ्रातृ॑व्यस्य व॒धाय॑।। १७।।

18.                 ओ३म् अग्ने॒ ब्रह्म॑ गृभ्णीष्व ध॒रुण॑मस्य॒न्तरि॑क्षं दृꣳह ब्रह्म॒वनि॑ त्वा क्षत्र॒वनि॑ सजात॒वन्युप॑दधामि॒ भ्रातृ॑व्यस्य व॒धाय॑। ध॒र्त्रमसि॒ दिवं॑ दृꣳह ब्रह्म॒वनि॑ त्वा क्षत्र॒वनि॑ सजात॒वन्युप॑दधामि॒ भ्रातृ॑व्यस्य व॒धाय॑ । विश्वा॑भ्य॒स्त्वाशा॑भ्यऽउप॑दधामि॒ चित॑ स्थोर्ध्व॒चितो॒ भृगू॑णा॒मङ्गि॑रसां॒ तप॑सा तप्यध्वम् ।। १८।।

19.                 ओ३म् शर्मा॒स्यव॑धू॒तꣳ रक्षोऽव॑धूता॒ऽअरा॑त॒योदि॑त्या॒स्त्वगसि॒ प्रति॒ त्वादि॑तिर्वेत्तु। धि॒षणा॑सि पर्व॒ती प्रति॒ त्वादि॑त्या॒स्त्वग्वे॑त्तु दि॒वः स्क॑म्भ॒नीर॑सि धि॒षणा॑सि पार्वते॒यी प्रति॑ त्वा पर्व॒ती वे॑त्तु।। १९।।

20.              ओ३म् धा॒न्य॒मसि धिनु॒हि दे॒वान्प्रा॒णाय॒ त्वोदा॒नाय॑ त्वा व्या॒नाय॑ त्वा। दी॒र्घामनु॒ प्रसि॑ति॒मायु॑षे धान्दे॒वो वः॑ सवि॒ता हिर॑ण्यपाणिः॒ । प्रति॑गृभ्णा॒त्वच्छि॑द्रेण पा॒॒णिना॒ चक्षु॑षे त्वा म॒हीनां॒ पयो॑ऽसि ।। २०।।

21.                 ओ३म् दे॒वस्य॑ त्वा सवि॒तुः प्र॑स॒वेश्विनो॑र्बा॒हुभ्या॒म्पू॒ष्णो हस्ता॑भ्याम्।। सं व॑पा॒मि समाप॒ऽओष॑धीभिः॒ समोष॑धयो रसे॑न। सꣳ रे॒वती॒र्जग॑तीभिः पृच्यन्ता॒ᳬ सम्मधु॑मती॒र्मधु॑मतीभिः पृच्यन्ताम्।। २१।।

22.              ओ३म् जन॑यत्यै त्वा॒ संयो॑मी॒दम॒ग्नेरि॒दम॒ग्नीषोम॑योरि॒षे त्वा॑ घ॒र्मो॒सि वि॒श्वायु॑रु॒रुप्र॑थाऽउ॒रु प्र॑थस्वो॒रु। ते॑ यज्ञप॑तिः प्रथताम॒ग्निष्टे त्वचं॒ मा हिंꣳसीद्दे॒वस्त्वा॑ सवि॒ता श्र॑पयतु॒ वर्षि॒ष्ठेधि॒ नाके॑ ।। २२।।

23.              ओ३म् मा भे॒र्मा सँवि॑क्था॒ऽअत॑मेरुर्य॒ज्ञोऽत॑मेरु॒र्यज॑मानस्य प्र॒जा भू॑यात्त्रि॒ताय॑ त्वा द्वि॒ताय॑ त्वेक॒ताय॑ त्वा ।। २३।।

24.              ओ३म् दे॒वस्य॑ त्वा सवि॒तुः प्रे॑स॒वेऽश्विनो॑र्बा॒हुभ्याम्पू॒ष्णो हस्ता॑भ्याम्। आद॑देऽध्वर॒कृतं॑न्दे॒वेभ्य॒ऽइन्द्र॑स्य बा॒हुर॑सि दक्षि॑णः स॒हस्त्र॑भृष्टिः श॒तते॑जा वा॒युर॑सि ति॒ग्मते॑जा द्विष॒तो व॒धः ।। २४।।

25.              ओ३म् पृथि॑वि देवयज॒न्योष॑ध्यास्ते॒ मूल॒म्मा हिंꣳसिषं व्रजङ्ग॑च्छ गोष्ठानंवर्ष॑तु ते॒ द्यौर्बधा॒न दे॑व सवितः पर॒मस्या॑म्पृथि॒व्याꣳ श॒तेन॒ पाशै॒र्योऽस्मान्द्वेष्टि॒ यञ्च॑ व॒यन्द्वि॒ष्मस्तमतो॒ मा मौ॑क् ।। २५।।

26.              ओ३म् अपा॒ररुं॑ पृथि॒व्यै देव॒यज॑नाद्वध्यासँव्र॒जङ्ग॑च्छ गो॒ष्ठानं॒वर्ष॑तु ते॒ द्यौर्ब॑धा॒न दे॑व सवितः पर॒मस्या॑म्पृथिव्याᳬ श॒तेन॒ पाशै॒र्योऽस्मान्द्वेष्टि॒ यं च॑ व॒य द्विष्मस्तमतो॒ मा मौ॑क् । अर॑रो॒ दिव॒म्मा प॑प्तो द्र॒प्सस्ते॒ द्याम्मा स्क॑न्व्रजङ्ग॑च्छ गो॒ष्ठानंवर्ष॑तु ते॒ द्यौर्ब॑धा॒न दे॑व सवितः पर॒मस्या॑म्पृथि॒व्याᳬ श॒तेन॒ पाशै॒र्योऽस्मान्द्वेष्टि॒ यञ्च॑ व॒यं द्वि॒ष्मस्तमतो॒ मा मौ॑क् ।। २६।।

27.              ओ३म् गा॒य॒त्रेण त्वा॒ छन्द॑सा परि॑गृह्णामि॒ त्रैष्टु॑भेन त्वा॒ छन्द॑साॱ परि॑गृह्णामि॒ जग॑तेन त्वा॒ छन्द॑सा॒ परि॑गृह्णामि॒ । सु॒क्ष्मा चा॑सि शि॒वा चासि स्यो॒ना चासि॑ सुषदा॑ चा॒स्यू॑र्ज॑स्वती॒ चासि॒ पय॑स्वती च ।। २७।।

28.              ओ३म् पु॒रा क्रू॒रस्य॑ वि॒सृपो॑ विरप्शिन्नुदा॒दाय॑ पृथि॒वीञ्जी॒वदा॑नुम्। यामै॑र॑यँश्च॒न्द्रम॑सि स्व॒धाभि॒स्तामु॒ धीरा॑सोऽअनु॒दिश्य॑ यजन्ते। प्रोक्षणी॒रा॒सा॑दय द्विष॒तो व॒धो॒ऽसि ।। २८ ।।

29.              ओ३म्   प्रत्युष्ट॒ꣳ र॒क्षः प्रत्यु॑ष्टा॒ऽअरातयो॒ निष्ट॑प्प्त॒ꣳ रक्षो॒ निष्ट॑प्ता॒ऽअरा॑तयः। अनि॑शितोऽसि सपत्न॒क्षिद्वा॒जिनं॑ त्वा वाजे॒ध्यायै॒ सम्मा॑र्ज्मि। प्रत्यु॑ष्ट॒ꣳ रक्षः॒ प्रत्यु॑ष्टा॒ऽअरा॑तयो॒ निष्ट॑प्त॒ꣳ रक्षो॒ निष्ट॑प्ता॒ऽअरा॑तयः। अनि॑शितासि॒ सपत्न॒क्षिद्वा॒जिनी॑न्त्वा वाजे॒ध्यायै॒ सम्मार्ज्मि ।। २९।।

30.              ओ३म् अदि॑त्यै॒ रास्ना॑सि॒ विष्णो॑र्वे॒ष्पो॒स्यू॒॑र्जे त्वाऽद॑ब्धेन त्वा॒ चक्षु॒षाव॑पश्यामि। अ॒ग्नेर्जि॒ह्वासि॑ सु॒हूर्दे॒वेभ्यो॒ धाम्ने॑ धाम्ने मे भव॒ यजु॑षे यजुषे ।। ३०।।

31.                 ओ३म् स॒वि॒तुस्त्वा॑ प्रस॒वऽउत्पु॑ना॒म्यच्छि॑द्रेण प॒वित्रेण सूर्यस्य र॒श्मिभिः॑। स॒वि॒तुर्वः॑ प्र॒स॒वऽउत्प॑ना॒म्यच्छि॑द्रेण पवि॒त्रे॑ण सूर्य॑स्य र॒श्मिभिः॑ । तेजो॑सि शु॒क्रम॑स्य॒मृत॑मसि॒ धाम॒ नामा॑सि प्रि॒यन्दे॒वाना॒मना॑धृष्टं देव॒यज॑नमसि ।। ३१।।

इति प्रथमोऽध्यायः